Трендови за уредување на домот во 2025-та

Пригушените бои од 2024-та одат на страна, затоа што оваа година на сцена настапуваат богатите палети на бои. Темно зелена, длабокоокеанско сина и луксузно виолетова – ова се нијанси што создаваат чувство на раскош и интимност во просторот, правејќи го да се доживува величествено. Тие особено доаѓаат до израз кога ќе се искомбинираат со помеки и понеутрални тонови, кои овозможуваат просторот визуелно да дише. 

Заминати се деновите на едноставно преземање на стиловите на внатрешно уредување од Пинтерест. Време е за поперсонализиран пристап. Наместо само да се копира еден стил во просторот, тој ќе треба да се спои со долготрајните потреби на луѓето што живеат во домот и нивната лична естетика. Специјални детали, винтиџ декор, стари семејни предмети или мебел, уникатни занаетчиски изработени парчиња – сите тие годинава ќе бидат во преден план при дизајнирањето на ентериерот. 

Ако во 2023 и 2024 година луѓето сакаа да ги спаруваат своите обоени ѕидови во зелено, сино или црно со мебел во истата боја, годинава овој тренд на спарување се искачува на повисоко ниво. Во 2025 година ќе се спаруваат шари! На пример, спарете ги шарите на тапетите и плочките со шарите на теписите и украсите и ќе добиете пријатен и топол простор. 

Индустрискиот изглед во 2025 година ќе еволуира. Ќе изгледа пософистицирано и не толку студено. Ќе се заоблуваат аглите на традиционалниот индустриски декор, просторот ќе се исполнува со стари материјали, теписите ќе имаат пригушени нијанси или суптилни текстури со што ќе се создаваат пријатни и привлечни простори. Во секој случај, фокусот на овој стил ќе остане на одржливоста, еко-свесниот дизајн и автентичноста. 

Растенијата се нешто што како тренд се наметна во 2020 година и пет години подоцна, не престануваат да бидат важен дел од внатрешниот дизајн. Интересно е што оваа година водечките дизајнери на ентериер очекуваат дека растенијата ќе се користат како елементи за визуелно врамување на парчиња мебел во домот и како живи скулптури. Освен нив, тука се и живите ѕидови, собните дрвја, внатрешните дворчиња и големите прозорци што нудат директна глетка кон надворешното зеленило. 

Во домовите кои имаат можност за тоа, оваа година на големо ќе се интегрираат кујните и дневните со дворските делови во близина на куќата за целосно внатрешно-надворешно искуство. Големите лизгачки врати и прозорците на преклопување (хармоника) ќе бидат значителен тренд оваа година. А тука се и летните кујни, надворешните простори за скара, фурните и баровите кои се претопуваат со внатрешниот простор, правејќи го готвењето и дружењето со пријателите уникатно искуство на слеано движење меѓу внатре и надвор.