Птици и покриви – полетна пролетна приказна

Добредојдовте на мала прошетка низ светот на урбаната екологија, каде што покривот ги штити нашите живеалишта, но е и живеалиште за многу птици.

Кога се зборува за покривите, најчесто се мисли на заштитата што тие ја претставуваат за нашиот дом, на сигурноста што ни ја нудат и на нивната надворешна убавина. Но, кога ќе дојде пролет, ние размислуваме и за нешто друго – за покривите како дом на птиците.

Птиците и покривите од ќерамиди

Птиците ги сакаат покривите со ќерамиди, поради неколку причини. Со самото тоа што се наоѓаат на повисоко, тие им нудат природна заштита од грабливците, сигурно место каде што безгрижно можат да се засолнат – себеси и своите младенчиња.

Дополнително, покривите од ќерамиди имаат празнини кои се идеални за свивање гнезда. Стреите, како најпосакувано место за изградба на гнезда, за птиците претставуваат и заштита од непријатните временски услови како дожд, ветер и директно сонце. Од друга страна, пак, глинените ќерамиди ја задржуваат топлината, што е важно особено за студените ноќи.

На нашите простори птиците кои најчесто можеме да очекуваме да го делат покривот со нас се:

1. Ластовички

птици-преселници

Овие мали енергични птици се преселници, кои напролет ни доаѓаат, а наесен заминуваат. Во топлите месеци додека престојуваат тука, тие се сместуваат во новите или старите свои гнезда кои ги градат од кал и слама, најчесто под ќерамидите или стреите. И нашата фабрика во Виница има многу гнезда на ластовици, за кои се грижи секоја сезона одново да ги пречекаат своите пердувести сопственици, а со тоа и за зачувување на биоразновидноста во нашата околина.

2. Врапчиња

Врапчињата се најпознатите пердувести жители под покривите. Тие ги обожаваат малите дупки и просторите меѓу ќерамидите, особено во куќите со традиционални покриви и во нив ги градат своите гнезда. Интересно е што едно врапче може да направи гнездо и во простор од само неколку сантиметри.

3. Штркови

големи птици-преселници

Штом дојде пролетта, заедно со ластовичките ни доаѓаат и штрковите. Овие големи птици-преселници со своите големи гнезда од кои неретко ѕиркаат малите главчиња на подмладокот, во урбаните средини се вистинска атракција. А нивни најчест избор за свивање гнездо се покривите од ќерамиди и бандерите.

Урбана симбиоза

Луѓето имаат соживот со птиците откога знаат за себе. Птиците помагаат во контролирањето на бројот на инсекти во воздухот, затоа што се хранат со мушички, муви, комарци итн. Присуството на птици во средината укажува на здрав урбан екосистем, а нивната песна носи радост и живост во нашето секојдневие.

Затоа, важно е да ги заштитиме птиците и нивните живеалишта. Еве неколку начини на кои можеме да го сториме тоа:

да не ги отстрануваме гнездата во сезоната кога им се испилуваат младенчињата (април-август);
да бидеме внимателни при инсталација на олуци, соларни панели или изолација за да не им ги уништуваме гнездата;
при градење нов или реновирање на покривот, да користиме природни глинени ќерамиди, кои немаат хемикалии штетни за животната средина, а со тоа и за птиците.

Доколку на вашиот покрив или под стреата има гнездо со птици, можете да поставите мала камера преку која заедно со семејството ќе го следите животот на птиците. На децата сигурно ќе им биде забавно, а сите заедно можете многу да научите за начинот на кој функционира природата.